Psa 91 | YON | STEP | Karub kane kuu Korem Burudandoonman ye dorondarimbon aom dobaraneen kuu Aromkono Koremman ye kubun aom kwane dobaraneen.

Psalms 91

Yook 91

1 Karub kane kuu Korem Burudandoonman ye dorondarimbon aom dobaraneen kuu
Aromkono Koremman ye kubun aom kwane dobaraneen.
2 NembedYariman yaa yedmaniin, “Ne kukbimaabbon, ne aromne angkumonimbon,
ne God, eb yaambed angkumone doriin.” andaniin.
3 Anam kuu yembed eb kuu arud ye barang ye kawaad nong yaa nen angka kowaneen,
kwane dukni yeman ye bob anikad yaa kangkon eb kuu nen angka kowaneen.
4 Ye buraab kumbed eb kuu kankowe dabunaneen,
kwane ye buraabdem aombed eb kuu kukbaneen,
ye ma korondiyiibban weng awini ye inamen kuu eb kombe areb eb aromne angkumonimbon areb kui.
5 Amnoom ye arud barang yaa kuu eb unaabban,
kwane awingyabbed barandi ye ana yaa kangkon unaabban.
6 Dukni yeman amnoombed yareboon yaa unaabban,
kwane monmari yeman aronkob angka yenbandimaan yaa kangkon unaabban.
7 Karub 1,000iib kuu eb dia yowore kuburiwen keraneen
o karub 10,000iib kuu eb wiwi angka yowore kuburiwen keraneen kuu
arud barang maambed eb yaa ma dia keraanban.
8 Eb kuu eb indobmo kerekne wedmaneewe,
miin arewa kamenabidan yaa ukum kondaneen.
9 Kedi,Yariman kuu eb kukbimaanman.
Korem Burudandoon Arimbed Ye God ye kerekmen yaambed doreeb kowe,
10 arud ye barang kuu eb yaa ma mene aanban,
monmari yeman kuu ewambib dia ma manaanban kui.
11 Amborom kuu Godbed ye engyus eb dowad ben yuraneena
eb kuna kuna wini ye dowad kerebdombere oonaniib kowe.
12 Eb kuu yi dingkimbed awine kankoonaniib,
eb yon kuu bot arimbed enbandaan andiwed.
13 Ebbed laiyoniib niin arud niin kobrayiib kuu dore bunganeeb,
laiyon arudiib niin arud niin kambariyiib kangkon dore bunganeewe duknaniib.
14 Yarimanbed yedmoon, “Ye kuu ne yaa mimyob dowaken keewimaan kowe, arud ye barang yaa kuu ye nen angka kowaniin.
Yariman kuu ne God ande yedmimaan kowe, ye nen dorondaraniin kii.
15 Ye kuu ne yaa baandaneene nembed inandunaniin.
Dabawiib keraneene ne kuu ye yaa dobere awanenaniin.
Ye kuu bobni yaa burudande nendeni ye aningko kuu arimbed kankoonaniin.
16 Aron doboob ye dobiri konaniine kubimo dobaraneen,
kwane bobni yaa burudande bindi ye kiwaan nembed ongmaan kuu korokbenaniin kii.” andoon.